Puesie : Spanti'core
à passi minuti

Puesie : Spanti'core à passi minuti

Una parolla di l’autori

Natu in Bastia in 1960, aghju campatu cù inde l’orechja a musica di a lingua corsa cù tuttu ciò ch’ella mi cuntava mammone. Da e muntagne rusinche à e strette bastiacce;

passatu per a facultà ci aghju scontru tanti è tanti amici chì m’anu purtatu u soiu, ma in ssu mentre u scontru cù quelli chì avianu da fà i chjami aghjalesi avia digià allargatu a vista è u sente.cù ghjiseppu aghju dinù apertu a porta di l’amicizia è di a cunsunenza di spiritu è di parlata…è à spessu vuchemu da u quotidianu sin’à e nostre loche cumune verdi a prova cunfinaghja.

È ci simu avvisri chì da u purtellu di casa s’apre l’universu, da a nostra lingua à quella cumuna à l’omi è ch’omu chjama puesia.

 Ogni tantu

à u capulà di a serra

ci vole à piglià u tempu è scrive

ùn ti rimpiazzerà u passu ne a scelta

ùn ti barratterà u gestu è a fabbricazione

ùn ti derà l’estru è u sensu sicuru

ma ti serà per pocu u soffiu novu è u pesu ripostu

per ripiglià fiatu, apre l’ochji di novu

empieti di u celu l’ochji spalancati

è crede in lu chjassu chì vene

ogni tantu

 Patriziu Croce

 Á passi minuti, eccu u titulu sceltu per una spassighjàta tra voi è noi, una manera di sprime ció chí l’omu pó risente ghjuntu chellu hè à l’età chí certi chjamanu   l’età di raggió.  Piú di cinquantanni d’esistenza, un omu, l’omu ind’ u cambiamentu perpetuale!

 Un  bisognu di lascià nant’ à a pagina mumenti chí anu toccu, incantatu, feritu.

 Ma u piacè hè ancu più grande quandu affiancu à voi si trova un omu di tamantu valore, un omu chí sente a lingua, a so Corsica, l’umanu. Patriziu era quellu chi m’hè parsu u veru pè fa un pezzu di viaghju ; dopu tanti anni passati à discorre, à sparte… mi paria cum’è un evidenza di travaglià incù l’autore, u pueta, ma  soprattuttu l’omu.

A puesia una manera di cantà a so ricunniscenza à l’umani  chi m’anu accumpagnatu,   allegeritu l’esistenza ma dinù, l’occasione di un striddu, l’espressione chi qualcosa  si ferma    à fà in stu mondu  duve Ognunu chjode spessu l’ochji, l’orechje pè ùn vede, pè ùn sente…

Una spassighjata  pè sola ambizione    di  mette in lume un parè, una manera di pensà o ancu di campà  ma mai una lezzione per quellu chí si metterà ind’è i  nostri passi.

 Ghjiseppu Antò Salviani

 

 

 

 

 

 

 Á i nostri figlioli Lisa Maria, Carlu Maria.

Petru Paulu, Antò Maria.

Á Dedè Nobili, pueta è amicu.

 

 

À Lisa Maria (a mo figliola)

Vogliu arrembammi à li nuli

Azzingammi à lu sole

Tesse una funa di fole

À l’eterni mari muti

Apparrechjà la barcella

Chì ci vucherà felice

Cù le sirene à l’orice

Di la cuntrata più bella

Duve hè l’ultimu tesoru

Chì ne vale più cà l’oru

È ch’omu trova cusì

Per offre à le ciucciarelle

Di le centumila stelle

Chì spampillulonu quì

        Patriziu Croce

 

 

 

 

 

 

 

 

 

 

 

 

 

 

 

 

 

 

 

 









Laissez un commentaire

Votre adresse de messagerie ne sera pas publiée. Les champs obligatoires sont indiqués avec *

Ce site utilise Akismet pour réduire les indésirables. En savoir plus sur comment les données de vos commentaires sont utilisées.

error: Ce contenu est protégé par les droits d\\\\\\\'auteur !!